Aquino midayeg sa gitampo sa NEDA alang sa kalamboan sa nasud

Ni Claro A. Lanipa

PAGADIAN CITY, 30 Jan (PIA) – Atol sa gipahigayong kasaulogan sa ika 40 nga anibersaryo sa National Economic Development Authority (NEDA) kagahapon (Martes), gidayeg ni Presidente Benigno S. Aquino III ang gitampo sa maong ahensiya sa pagpalambo sa atong nasud.

Ang ekonomiya sa nasud miuswag, miingon ang Presidente sa iyang mensahe atol sa kasaulogan nga gipahigayon sa buhatan sa NEDA sa dakbayan sa Pasig.

Matod pa sa hepe ehekutibo nga samtang nagtubo ang ekonomiya, ang NEDA kinahanglan maningkamot pa gayud aron makab-ot nato ang malahutayong ug halapad pag-uswag alang sa kaayohan sa mga Pilipino.

“Aduna kitay daghan pang buluhaton, ug ang NEDA mahimong mas importanteng kaabag sa umaabot nga mga katuigan. Kon gusto kita maseguro nga ang atong mag tinguha mabunga ug maayong resulta, ang atong sunod nga lihok kinahanglan banabanaon,” miingon siya.

“Nagsalig kami kaninyo. Karon, mohangyo ako sa matag usa kaninyo aron maningkamot pa gayud sa pagpatuman sa inyong mga katungdanan,” dugtong pa sa Presidente.

Aron molahutay kining kalamboan, ang kagamhanan kinahanglan mopadayon sa mga panglimbasog sa pagkab-ot sa tumong, wagtangon ang korupsyon, ug ipauswag ang pag-indigay sa nasud sa kalibutanong merkado.

Ang kagamhanan mopadayon usab sa pagpamuhunan sa human capital pinaagi sa edukasyon, maayong panglawas, ug ubang mga serbisyo, dugang pa niya ang administrasyon motutok usab sa ubang mga sekta alang sa pag-uswag ug magpahiluna sa mga inisyatibo nga makapatuboy ug kalamboan.

Mipadayag usab sa Presidente ang iyang kalipay ngadto sa NEDA  sa pagpahinungud niini sa pagpatuman sa ilang mando ug nagsilbi sa katawhan nga walay sagol politika o pagpatuboy sa kaugalingon. (PND/CAL/PIA9)