Pilipinas ug Malaysia nagkauyon pagpalig-on sa ilang relasyon

Ni Alfonso T. Ruda

DIPOLOG CITY, OCT. 16(PIA)---Ang Pilipinas ug Malaysia nagkauyon nga labi pang lig-onon ang ilang relasyon sa natad sa turismo, edukasyon, kultura, panglawas, teknolohiya sa impormasyon, labor ug anti-trafficking.

Ang kasabutan nakab-ot dihang gipahigayon ang bilateral meeting sa Malakanyang niadtong Lunes nila ni Presidente Benigno S. Aquino III ug Malaysian Prime Minister Dato Sri Mohd Najib Bin Tun Abdul Razak, kinsa ania sa nasod sa usa ka opisyal nga pagbisita.

Sa pahayag nga giluwatan human sa ilang miting, ang duha ka lider nagkauyon nga labi pang lig-onon ang dynamic ug protective partnership sa duha ka nasod pinaagi sa (1) Pagpahimulos sa Philippines-Malaysia Joint Commission Meeting aron molahutay ang momentum sa ilang partnership; (2) pagpahigayon ug regular nga investment forum; (3) pagbinayloay ug trade ug investment missions; (4) pagpadali sa negosasyon sa gisugyot nga kasabutan sa pagtinabangay.

Si Primero Ministro Najib nahidangat sa Manila niadtong Dominggo para sa iyang Opisyal nga pagbisita sa nasod gikan sa Oktubre 14 hangtud sa Oktubre 16. Kauban niya sa iyang delegasyon ang iyang asawa nga si Madam Datin Paduka Sri Rosmah Mansor.

Si Primero Ministro Najib ania sa nasod aron saksihan ang makasaysayanong pagpirma sa Framework Agreement tali sa Pilipinas ug Moro Islamic Liberation Front isip third-country facilitator.

Gipahalipayan ni Najib si Presidente Benigno Aquino III uban ang pagpasalig nga padayong suportahan sa  Malaysia ang nagpadayong negosasyon sa kalinaw ug ang implementasyon sa Framework Agreement.

Sa iyang bahin, gipasalamatan usab ni Presidente Aquino si Primero Ministro Najib sa suportang gilugway niini isip facilitator sa nagpadayong negosasyon sa kalinaw tali sa gobyerno ug MILF sukad niadtong 2001 ug sa ilang pagpangulo sa International Monitoring Team sukad niadtong 2004. (ATR/PCOO/PIA9-Zambo Norte)