Malakanyang hugtanong mikondenar sa pagpangatake sa BIFM sa Maguindanao ug North Cotabato

Ni Alfonso T. Ruda

DIPOLOG CITY, AUG. 6(PIA)--- Hugtanong gikondenar sa Kagamhanang-Aguino ang dungang pagpangatake sa mga membro sa Bangsamoro Islamic Freedom Movement sa mga instalasyon sa militar sa Maguindanao ug North Cotabato niadtong adlawng Domingo, Agosto 5, 2012.

Sa sulat ni Presidential Adviser on Peace Process, Teresita Deles nga gibasa ni Presidential spokesperson Edwin Lacierda sa regular nga press briefing sa Malakanyang, kini nagkanayon, nga ang gihimong pag-atake sa BIFM panahon sa bulan sa Ramadan mao lamay pagpakita sa maong grupo sa ilang kaluog ug kawalay pagtahod sa balaanong bulan sa Ramadan ug pagbaliwala sa mga kinabuhi nga nagkatibulaag gumikan sa walay hinungdang pagpangatake.

Sumala pa sa taho sa military,ang mga instalasyon sa lungsod sa Talayan, Datu Unsay, Datu Saudi Ampatuan ug Shariff Aguak sa Maguindanao ug Midsayap sa North Cotabato, dungang gi-atake sa mga armadong kalalakihan nga gipanguluhan ni Ustadz Carialan, ang Chief of Staff sa BIFM.

“Ang BIFM dili na tipik sa Moro Islamic Liberation Front(MILF), busa dili na kini sakop sa ceasefire agreement. Kanhi naila isip Bangsamoro Islamic Freedom Fighters(BIFF),ang BIFM gipanguluhan ni Kumander Ameril Umbra Kato, uban sa iyang mga sumusunod, mibulag sa MILF ug mideklarar sa iyang kaugalingon nga bougat kon usa ka tawong dili na mosunod ug kamanduan,” matod pa ni Deles.

“Andam ang puwersa sa kagamhanan nga manalipod ug sigurohon ang kaluwasan sa komunidad kon mo-atake gyud ug usab ang nasangpit nga grupo. Nagpadayon na karon ang hot pursuit operation batok kang Carialan ug mga kauban aron mataral sila sa hukmanan ,” matod pa ni Deles.  

Gisiguro usab ni Deles nga dili makaapektar sa nagpadayong negosasyon sa kalinaw tali sa gobyerno ug MILF ang labing ulahing nanghitabo sa Maguindanao ug North Cotabato.

Samtang magsugod na karong semanaha ang ika-30 nga exploratory talks tali negosyador sa gobyerno ug MILF sa Kuala lumpur, Malaysia, si Deles nagkanayon nga nagpabiling lig-on ang tinguha sa Administrasyong Aquino nga ipadayon ang negosasyon hangtud nga makab-ot sa duha ka partido ang kasabutan sa kalinaw ug mahunong na ang dugay na kaayong kagubot sa Mindanao ug ihatag sa katawhan ang hingpit nga kalinaw.(ATR/PCOO/PIA9-Zambo Norte)