Palasyo miingon: RH Bill makatabang sa ekonomiya sa nasod

Ni Alfonso T. Ruda

DIPOLOG CITY, AUG. 6(PIA)---Nanawagan karon ang Malakanyang sa publiko nga suportahan ang Reproductive Health Bill nga giduso sa administrasyong Aquino uban ang pag-ingon nga makatabang kini sa nasod, ilabi na sa natad sa ekonomiya.

Sa usa ka pakighinabi sa radyo DZRB, Radyo ng Bayan, gipangayo ni  Presidential Legislative Liaison Office Chief, Manuel Mamba sa mga magbabalaod nga ipasar na ang Reproductive Health Bill, tungod kay mahinungdanon kini sa nasod.

Ang pahayag giluwatan ni Mamba samtang nagpahigayon ug rali ang mga membro sa Simbahang Katoliko sa Edsa Shrine niadtong Sabado, Agosto 4, 2012 aron supakan ang RH Bill.

“Maanindot kaayo kining maong  balaodnon. Kon ayuhon lang natog basa, atong makita nga ilalom niining maong balaodnon, dunay maayong kaugmaon ang atong mga anak ug ang katawhang Filipinhon sa umaabot nga mga adlaw,” matod pa ni Mamba.

“Usa pa, ang atong ekonomiya kinahanglang makasabay sa pagtubo sa atong populasyon, nga sa sobrang pagdako sa atong populasyon, bisan kanus-a dili gyud makasabay ang atong ekonomiya. Gusto nato ang maayong kaugmaon para sa atong mga kaigsoonan, ato nang ipasar ang RH BILL,” dugang pa ni Mamba.

May kalabutan sa pahayag nga ang RH Bill pro-abortion, si Mamba miingon nga wala kini sa maong balaodnon, ug paagi lang kini aron ilaron o dili tug-anan sa kamatuoran ang katawhan.

“Ang kabalaka sa simbahan nga dunay abortion niining maong balaodnon, dili kana matuod. Atong tug-anan sa matuod ang katawhan,” uban ang pag-ingon dunay obligasyon ang gobyerno nga hatagan ug katungod ang katawhan nga magpili sa gidak-on sa ilang pamilya.

Niining panahona, duna na silay igu-igong representante sa duha ka Balay sa Kongreso ug kompiyansa nga mapasar ra ang nasangpit nga balaodnon.

Nanawagan usab ang opisyal sa publiko ug mga magbabalaod nga dili “i-politicize” ang isyo tungod kay dili kini kabahin sa politika kundili kabahin kini sa kaugmaon sa atong nasod.

Gatusan ka mga tawo ang nagtigom sa Edsa Shrine niadtong Sabado sa hapon nga gihulagway sa Simbahang Katoliko nga usa ka dakong rali aron ipakita ang hugtanong pagsupak sa mga Filipino sa nakapending nga balaodnon sa lehislatura sulod na sa 4 ka tuig.(ATR/PCOO/PIA9-Zambo Norte)