Anti-Enforced or Involuntary Disappearance Act of 2012 gipirmahan ni Presidente Aquino

Ni Alfonso T. Ruda

DIPOLOG CITY, DEC. 24(PIA)---Gipirmahan na ni Presidente Benigno Aquino III na niadtong Biyernes (Disyembre 21,2012) ang Anti-Enforced or Involuntary Disappearance Act of 2012.

Matod ni Presidential spokesperson Edwin Lacierda, ang bag-ong balaod naghimo sa pagdakop, detensiyon, pagdagit ug uban pang matang sa paghikaw sa kagawasan sa tawo nga usa ka kasong kriminal.

Lakip sa mga notadong kaso sa Anti-Enforced or Involuntary Disappearance mao ang mga kaso nila Jonas Burgos, Sherlyn Cadapan ug Karen Empeño  ug mga desaparecidos. Ilalom sa Anti-Enforced or Involuntary Disappearance Act of 2012, mahimo nang dakpon ug pasakaan ug kaso ang mga puwersang pangseguridad.

Usa sa mga maanindot nga probisyon sa maong balaod naglakip sa non-exemption sa mga malapason gikan sa amnestiya, kombiktado man o nag-atubang ug kaso nga manubag sa nahimo nilang kasal-anan.

Ilalom sa maong balaod, walay gahum ang gubat o unsa pang pampublikong emerhensiya pagsuspende ang implementasyon sa anti-disappearance law. Obserbahan usab ang Command Responsibility, diin ang mas taas nga opisyal manubag usab sa kasal-anan nga nahimo sa iyang mga sakop.

Sa samang higayon, mahimo usab nga supakon sa usa ka sumusunod ang kamanduan sa iyang labaw  nga ipatuman ang enforced disappearance. Nanawagan usab kini sa periodic update of registry sa tanang mga tawong nakaditini sa mga detention centers ug ang balaod nagdili usab sa pagpabarog ug mga sekretong pasilidad sa detensiyon.

Ang mga biktima ug pamilya sa enforced ug disappearance act mahimo usab nga mangayo ug bayad, restitusyon ug rehabilitasyon. Ang pinakabug-at nga silot ilalom sa Anti-Enforced or Disappearance Act of 2012 mao ang reclusion perpetua.

Gimanduan usab sa bag-ong balaod ang mga Human Rights Organizations nga mosalmot sa pagpanday sa Implementing Rules And Regulations sa nasangpit nga balaod.(ATR/PCOO/PIA9-Zambo Norte)