Pres. Aquino nanguna sa inagurasyon sa aircraft components manufacturing facility sa Batangas

Ni Alfonso T. Ruda

DIPOLOG CITY, OCT. 4(PIA)--- Si Presidente Benigno Aquino III nanguna sa pagbukas sa B/E Aeropace Inc. Philippines Facility diin iyang gipasalamatan ang kompaniya sa pagpili sa Pilipinas kay sa uban pang lokasyon.

Ang mga panghitabong sama niini maoy timailhan nga gisubay nato ang dalan padulong sa kalambuan. Ingon sila, padulong kita sa matarong nga direksyon diin ang tibuok kalibutan nagsugod na pag-ila sa dugay na kaayong nataligam-ang abilidad sa mga trabahanteng Filipino,” matod pa sa Presidente sa iyang mensahe atol sa maong kalihokan.

Matod pa sa Presidente, ang kalihokang sama niini nagkahulugan ug bag-ong tarabaho para sa mga Filipino ug ginansiya alang sa ekonomiya sa nasod. Gipasalamatan sa Presidente ang B/E Aerospace, Inc., sa pagbubo ug puhonan dinhi sa Pilipinas, kon ikonsidera nga ang pasilidad sa Batangas mao ang labing unang pasilidad sa B/E Aerospace gawas sa Estados Unidos ug Europa.

Ang Pilipinas nga napili gikan sa mubong listahan nga naa niining maong pasilidad maoy usa ka testamento nga usa na gayod kita ka competitive destination, matod pa niya.

Gihatagan ug punto sa Presidente nga uban sa pagbukas sa operasyon sa B/E Aerospace Inc, sa Pilipinas, napabalik sa nasod ang paggunit sa manufacturing sector, ilabi na sa aircraft components manufacturing.

Nagakadaghan na karon ang mga langyawng mamumuhunan nga misulod karon sa Pilipinas, matod pa sa Presidente uban ang pag-ingon nga ang AG & P nga nahimutang usab sa Batangas, mibubo usab ug puhonan sa pagmanufacture ug large oil, gas ug mining modules. Sa laing bahin, ang ubang kompaniya nag-invest usab sa paghimo ug barko,” matod pa niya.

Gihisgutan usab sa Presidente ang paglambo sa aviation sector nga naghighlight sa mga factors nga nagpalahutay sa kalambuan. Ang mga mamumuhunan sa nasod miari sa Pilipinas gumikan sa highly-skilled ug English-speaking workforce, mao ang polisiya sa gobyerno nga himoong patas ang level sa playing field para sa patigayon ug kasigoroan sa usa ka corruption-free bureaucracy.

Ang B/E Aerospace Inc., nga nagplanong mag-invest ug 100 milyones sa ilang pasilidad dinhi sa Pilipinas, magbukas sa ilang operasyon uban ang pasiunang 200 ka mga empleyado. Nagplano ang kompaniya nga himoon kining 500 ka tawo sunod tuig ug posibling paghimo niining 1,000 ka libo sa mosunod nga tulo ka tuig.   

Ang kompaniya mao ang usa nag-unang tighimo ug aircraft passenger cabins  interior products para sa komersyal, business ug military aircrafts.

Ang B/E Aerospace Inc., nagsilbi usab halos sa tanang kompaniya sa ayoplano; tighimo ug ayroplano; ug kompaniyang tig-paabang pinaagi sa ilang direktabg global sales ug customer support organizations.(ATR/PCOO/PIA9-Zambo Norte)