Malakanyang malipayong midawat sa “ranking” nga gihatag sa Economist Intelligence sa Pilipinas nga usa sa labing maayong lugar para sa micro-financing

Ni Alfonso T. Ruda

DIPOLOG CITY, OCT. 28(PIA)---Malipayong gidawat sa Malakanyang ang labing ulahing ranking nga gihimo sa international think tank, ang Economist Intelligence Unit (EIU) nga naghingalan sa PIlipinas nga usa sa labing maayong lugar sa kalibutan alang sa micro-financing.

“Usa kana ka maayong balita alang kanato. Ang micro-financing mahinungdanon alang kanato tungod kay maghatag kini ug kahigayonan sa mga small and medium start ups nga makasukad sa yuta ang ilang patigayon,” matod pa ni Deputy Presidential spokesperson Abigail Valte sa pakighinabi kaniya sa sibyaanang, DZRB, Radyo ng Bayan niadtong Sabado.

Ang nasod nahinganlan pag-usab nga usa sa mga nasod nga dunay maayong palibot para sa mga micro-enterprises, ika-upat sa 55 ka mga nasod nga nasurvey sa EIU. Misaka kini ug 2 ka lakang kay sa ika-unom nga puwesto nga nakuha sa Pilipinas niadtong miaging tuig.

Sa iyang report nga nag-ulohan,”Global Microscope on the Micro-finance Business Environment 2012,” ang EIU nagkanayon nga ang mga regulasyon nga gipatuman sa mga ahensiya sa gobyerno sama sa Bangko Sentral ng Pilipinas, nakatabang ug dako nga magpabilin ang Pilipinas sa nag-unang 10 ka mga nasod na dunay pinakadaghang micro-finance business nga mahigalaon sa palibot.

Ang mga regulasyon nga misuporta sa paglambo sa micro enterprises sa Pilipinas naglakip sa pagpadako sa kantidad nga gipautang sa mga bangko ngadto sa micro enterprises ug whole-sale lending sa mga bangkong gipanag-iya sa gobyerno nga nakabenepisyo sa mihulam nga mga micro enterprises.

Ang nasod nakapuntos ug 63.3 sa kinatibuk-ang micro-business environment ang nakalupig sa Pilipinas mao ang mga nasod sa Peru, (79.8); Bolivia (71.8); ug Pakistan nga dunay 67.4 puntos.(ATR/PCOO/PIA9-Zambo Norte)