Kagamhanan sa Korea mihatag ug tabang alang sa mga biktima sa ‘habagat’

ni Claro A. Lanipa

PAGADIAN CITY, Oct 23 (PIA) – Ang Department of Social Welfare and Development (DSWD) midawat ning miaging semana ug US$200,000 bili sa hinabang gikan sa kagamhanan sa Korea pinaagi sa Korea International Cooperation Agency (KOICA).

Ang maong mga hinabang gitumong alang sa mga pamilyang apektado sa ‘habagat’ dala sa bagyong ‘Gener’ nga nasinati sa Metro Manila ug ubang bahin sa Luzon sa milabay’ng bulan sa Agosto ning tuig.

Si DSWD Secretary Corazon Juliano-Soliman personal midawat sa donasyon gikan kang Ambahador Hyuk Lee sa usa ka ceremonial turn-over nga gipahigayon  sa buhatan mismo sa DSWD  sa dakbayan sa Quezon.

Ang maong donasyon gilangkoban sa 1,500 sets sa hygiene kits ug 4,000 ka mga habol. Ang donasyon miabot sa Pilipinas ning Septyembre ug sa walay paglangan gidala gilayon sa mga personahe sa DSWD sa Region III ug IV-A diin linibong pamilya sa Bulacan, Pampanga ug Laguna ang gibakwit.

Gipadayag ni Secretary Soliman ang iyang kinasingkasing pagpasalamat sa pagkamangihatagon sa kagamhanan sa Korea. Sa miaging tuig mitabang  sila sa mga biktima sa ‘Sendong’ ug karon mitunol gihapon sila sa ilang suporta alang sa mga pamilya apektado sa ‘habagat’ , dugtong ni Soliman.

“Kining mga butang makatabang gayud sa mga biktima nga mahilayo sa katugnaw ug magpabilin limpyo, ug makapahupay sa ilang mga pag-antos,” miingon si Sec. Soliman.

Sa iyang kabahin, si Ambahador Hyuk Lee mibutyag pag-usab ang pasalig sa iyang nasud aron motabang sa mga biktima sa kalamidad dinhi sa Pilipinas. (DSWD/CAL/PIA9)