Aquino mitudlo ni Padaca isip COMELEC Commissioner

Ni Alfonso T. Ruda

DIPOLOG CITY, OCT. 2PIA)---Gitudlo ni Presidente Benigno Aquino III ang kanhing Gobernador sa Isabela nga si Grace Padaca isip bag-ong Commissioner sa Commission on Election (COMELEC) kang kansang termino matapos sa Pebrero 2018.

Sa sulat nga pinitsahan ug Septyembre 28, 2012, gipangayo ni Presidente Aquino sa Commission  on Appointment ang daling kompirmasyon kang Padaca isip bag-ong COMELEC Commisisoner.

Si Padaca natawo niadtong Oktubre 25, 2013 ug nahimong Certified Public Accountant human nga migradwar nga Magna Cum Laude sa Lyceum of the Philippines sa Manila.

Bisan ug gitakbuyan siya sa sakit nga polio sa sayong pangidaron ug nakaparalisa sa duha niya ka tiil, nahimo si Padaca nga ma-impluwensiyadong magsisibya o brodkaster sa Isabela ug naghatag ug kadasig sa katawhan nga masabtan ang sibil ug politikanhong isyo ug makig-away sa ngalan sa katarong ug kaangayan.

Si Padaca nahimong sikat kon inila dihang iyang gipildi niadtong piniliay sa 2004 ang kanhing Gobernador nga si Faustino Dy, Jr., usa ka membro sa Politikanhong Dinastiya nga migunit sa Isabela sulod sa 40 ka tuig. Niadtong 2007, subli siyang napiling Gobernador sa Isabela dihang iyang giparot ang kanhing gobernador nga si Benjamin Dy.

Lakip sa mga pasidungog nga nadawat ni Padaca mao ang Ramon Magsaysay award para sa Government Service (2008), ang United States Department of State Woman of Courage award (2007), ang Benigno S. Aquino, Jr. Fellowships for Professional Development award (2006), ug ang First CEO Excel Awards (2005).

Usa usab siya sa co-founder sa Movement for Good Governance and Ethical Leadership nga gitawag ug  KAYA NATIN kauban nila ni kanhi Pampanga Governor Eddie Panlilio ug anhing DILG Secretary Jesse Robredo. PND (ATR/PCOO/PIA9- Zambo Norte)