Kagamhanang-Lokal nga walay Seal of Good Housekeeping, dili makautang sa bangko, matod sa DILG

Ni Alfonso T. Ruda

DIPOLOG CITY, AUG. 9(PIA)—Bugtong mga Kagamhanang-Lokal lamang nga dunay Seal of Good Housekeeping (SGH) ang mahimong makautang sa bangko, matod pa ni Department of Interior and Local Government (DILG) Secrretary Jesse Robredo.

Matod pa ni Robredo, kining kalambuan migawas samtang ang Bureau of Local Government Finance (BLGF) nag-isyo ug circular nga naglakip sa SGH isip usa sa mga rekisitos para sa mga LGUs nga mo-apply ug otoridad aron makahulam ug kuwarta sa bangko ug uban pang institusyong-pinansyal.

“Among gidawat kining maong kalambuan tungod kay giila na sab ang SGH sa ubang nasudnong ahensiya sa gobyerno ug nagpakabanang sektor isip epektibong paagi sa pag-ila kon ang usa ka LGU duna bay maayong pagdumala sa ilang panalapi ug andam nga mangutang ug mobayad niini,” matod pa ni Robredo.

Ang SGH gihatag sa mga LGUs nga walay di-maayong report gikan sa Commission on Audit (COA) ug nakatuman pag-post sa 12 ka mga gikinahanglang mga dokumentong-pinansyal. Ang mga SGH awardees kwalipikado usab nga makadawat ug incentive fund gikan sa 1 ngadto sa 7 ka milyon ka pesos alang sa ilang mga proyektong pangkalambuan.

Di pa lang dugay, gilusad Sa DILG ang SGH Bronze, Silver ug Gold, diin gawas sa naunang duha ka rekisitos, gidugang usab niini ang uban pang mga rekisitos sama sa pagtuman sa Government Procurement Act  ug Anti Red-Tape Act; Comprehensive Development Plan; ug taas nga benchmark performance sa Local Government Performance Management System (LGPMS).

Matod pa ni Robredo, uban ang pagkalakip sa SGH isip dugang rekisitos para makahulam ang usa ka LGU, nahimo nakarong dalan nga subayonn sa matag kagamhanang-Lokal ang maayong pang-gobyerno.

Karon, ang mga Kagamhanang-Lokal na lamang nga dunay SGH ug nagsubay sa Tul-id nga Dalan mao ang makahulam ug kwarta sa bangko aron pondohan ang ilang lokal nga mga proyekto.

Ang Local Finance Circular 1-2012 naghan-ay sa mga gikinahanglang dokumento nga isumiti sa LGU ngadto sa BLGF sa di pa sila hatagan ug Certificates of Borrowing ug Debt Service Capabilities kon kinahanglan gyud silang mangutang.

Ang circular nga gipirmahan ni Finance Sec. Cesar Purisima nga mao ang naglantaw sa BLGF mao ang mopuli sa Local Finance Circular No. 1-2000 nga gi-isyo niadtong Enero 19, 2000.

lalom sa bag-ong circular, gawas sa Seal of Good Housekeeping, ang mosunod nga mga dokumento gidugang na usab sa naunang mga rekisitos: sulat-hangyo gikan sa Lokal nga Hepe Ehikutibo; sertipikasyon gikan sa Legislative Body nga ang gisugyot nga proyektong pondohan sa maong loan nalakip sa na-aprobahang Annual Investment Plan sa kasamtangang tuig; authenticated nga kopya sa resolusyon nga naghatag ug pagtugot sa Hepe Ehikutibo nga mosulod sa “contract of loan”; ug kamatuoran sa pagsunod sa “full disclosure policy sa DILG, ug uban pa.(ATR/PCOO/PIA9-Zambo Norte)