Pres. Aquino mipirma ug EO nga nagmugna sa Transition Commission

Ni Alfonso T. Ruda

DIPOLOG CITY, DEC. 18(PIA)--- Si Presidente Benigno Aquino III mi-isyo karon ug Orden Ehikutibo numero 120 nga nagpabarog sa Transition Commission nga magpanday sa Bangsamoro Basic Law pinasikad sa Framework Agreement nga gipirmahan sa gobyerno ug Moro Islamic Liberation Front(MILF) niadtong Oktubre 15.

Si Presidential Adviser on the Peace Process Teresita Deles nagkanayon nga ang EO maoy “mipalig-on sa tinguha sa Presidente nga modas-og ang proseso sa kalinaw para sa Bangsamoro isip estratehikong inisyatibo para sa politikanhong estabilidad ug ekonomikanhong kalambuan.”

Midugang pa ang Peace Adviser nga ang EO mohatag usab ug mekanismo para sa matuod nga demokratikanhong kolaborasyon sa pagpanday sa gisugyot nga balaod diin mismong ang mga tawong apektado gilambigit sa pagpanday niini.

Ang EO mgmugna ug 15-ka tawong Transition Commission nga itudlo ni Presidente Aquino. Kasunod niini, ang gobyerno ug MILF magpagawas ug listahan sa mga kandidato gikan sa Bangsamoro ug mga residente sa lugar nga posibling masakop sa bag-ong political entity nga maglangkob sa mugnaong Transition Commission.

Gitakda usab niini nga ang TC magbutang ug buhatan ug makig-coordinate sa ubang ahensiya sa gobyerno ug kongreso aron mahuman agn ilang trabaho. Ang TC dunay pasiunang pahat nga 100 ka milyon ka pesos.

Sumala pa sa Orden Ehikutibo, ang TC mahimong morekomendar sa kongreso ug sa katawhan kon gikinahanglan ug mga kausaban sa Konstitusyon.

“Tumong niini nga ma-instalar ang Bangsamoro pinaagi sa usa ka Organic Act sa labing daling panahon aron duna nay piniling mga opisyal ang Bangsamoro pag-abot sa tuig 2016,” matod pa ni Meriam Coronel-Ferrer, ang Hepe sa mga Negosyador sa gobyerno. Dili usab kini magpugong sa TC o sa iyang mga membro nga eksaminon ang Konstitusyon ug irekomendar ang gikinahanglang reporma.

“Hinuon, una nang giklaro sa Presidente nga dili prayoridad ang pag-amendar sa Konstitusyon sulod sa iyang administrasyon,” dason pa ni Ferrer.

Motabang usab ang Transition Commission pag-ila sa mga proyektong pangkalambuan uban sa Bangsamoro Development Authority ug Bangsamoro Leadership Institute- duha ka institusyong dunay koneksyon sa MILF.

“Determinado ang gobyerno nga mapabarog ug balik ang mga lugar nga apektado sa kagubot ug mapadali ang socio-economic development sa rehiyon,” matod pa ni Ferrer. Makab-ot kini pinaagi sa paghatag ug gahum sa mga Bangsamoro mismo pinaagi sa ilang partisipasyon pag-umol sa ilang kaugalingong komunidad.”

Ang Transition Commission mahimo nang magsugod sa ilang trabaho samtang gipinalisar pa sa mga negosyador sa gobyerno ug MILF ang upat (4) ka mga annexes nga maoy magkompleto sa Framework Agreement sa Bangsamoro, “midugang pa si Ferrer.(ATR/OPAPP/PIA9-Zambo Norte)

  

Kagamhanang Aquino nagpadyag sa iyang pagtuo nga iyang mapadayon ang maayo nga relasyon sa Japan human nga si Prime Minister Noda midawat sa iyang kapildihan sa parliamentary elections

By Gideon C. Corgue

PAGADIAN CITY, December 17 (PIA) –- Ang kagamhanang Aquino nagpadayag sa iyang dako nga pagtuo nga kini ang mapadayon ang iyang  maayong relasyon sa Japan human nga si Japanese Prime Minister Yoshihiko Noda midawat sa iyang kapildihan sa parliamentary elections ning Sabado nga naghatag timailhan pagbalik sa gahum sa Liberal Democratic Party (LDP).

"Isip strategic ally ug partner, kita ang makatrabaho uban ang kagamhanan sa Japan. Kita ang makatrabaho uban ang bag-o nga liderato, ang liderato sa  LDP. Atong gilauman nga makapadayon sa atong mainit nga relasyon sa Japan," si Presidential Spokesperson Edwin Lacierda nagkanayon atol sa regular press briefing sa Malakanyang ning Lunes.

Si Prime Minister Noda misaad nga manaog isip party president human sa piniliay nagpadayag nga ang opposition LDP midaug sa dakong kadaugan sa parliamentary elections.

Ang lakang ni Noda naghatag agianan pagbalik sa gahum sa kanhi Prime Minister Shinzo Abe, ang kasamtangan nga pangulo sa conservative-leaning LDP.

Sa nakalabay nga tuig, si Presidente Aquino miduaw sa Japan sa tinguha nga dugang mapalig-on ang espesyal nga panaghigalaay nga namugna sa duha ka mga nasud sa nakalabay nga 55 ka tuig. (GCC/PCOO/PIA,Pagadian City)