DepEd, DBM, GSIS mipirmag kasabutan pagbalik sa benepisyo sa magtutudlo

Ni Alfonso T. Ruda

DIPOLOG CITY, SEPT. 15(PIA)--- Ang Departamento sa Edukasyon (DepEd), Department of Budget and Management (DBM) ug Government Service Insurance System(GSIS) mipirma di pa lang dugay ug usa ka kasabutan nga nagtumong nga masulbad ang dugay na kaayong problema sa wa-mabayring premiums sa kapin kon kulang 800 mil ka mga magtutudlo ug empleyado sa DepEd.

Ang pagpirma sa kasabutan didto sa Malakanyang gisaksihan mismo ni Presidente Benigno Aquino III.

Ilalom sa kasabutan, ang DBM maoy mobayad sa 6.92 bilyones ka pesos nga wa-mabayring premiums sa DepEd nga nagrepresentar sa bahin sa gobyerno ug mopadali sa bayad pinaagi sa paghatag sa pasiunang 50 porsiento sa kinatibuk-ang kantidad.

Sa iyang bahin, kalimtan na usab sa GSIS ang 14 bilyones ka pesos nga interest gikan sa 6.9 bilyones ka pesos nga wa mabayring premiums, ingon man paghatag ug 5 porsiento nga diskuwento sa principal base sa accelerated payment scheme sa DBM.

“Ang mga empleyado sa DepEd nga aktibo pa sa serbisyo makapahimulos na karon sa tukmang benepisyo. Kini naglakip sa mas dakong makuhang loan, ug posibling mas dakong benepisyo pagretiro nila sa serbisyo,” matod pa ni GSIS President ug General Manager Robert Vergara.

Midugang pa si Vergara nga kuwentahon na usab ug balik ang benepisyo nga nahatag na niadtong nagretiro na sa erbisyo.

“Iuli sa GSIS ang sobrang gikuha gikan kanila ug i-adjust ang ilang pensiyon base sa tukmang pagbalanse.”

Naglaum si Vergara nga ang kanunayng problema wala makolekta ug wala maremit nga compulsory contribution ngadto sa GSIS masulbad na gayod pinaagi sa inisyatibo sa DBM paglakip sa mga empleyado sa DepEd sa National Payroll System sa 2013.(ATR/PCOO/PIA9-Zambo Norte)    

Aquino malaumon nga ang kagamhanan ug MILF makakab-ot sa malahutayon nga kalinaw sa Mindanao

Ni Gideon C. Corgue

PAGADIAN CITY, Sept. 15-- Si Presidente Benigno S. Aquino III mipadayag sa ilang paglaum nga ang kagamhanan sa Pilipinas u gang  Moro Islamic Liberation Front (MILF), uban ang suporta sa publiko ang motangtang sa babag  pagkab-ot sa malahutayon nga kalinaw sa Mindanao.

Ang hepe ehekutibo miawahag samga Filipinos nga mopaluyo sa peace efforts alang sa malahutayon nga kalinaw atol paglusad sa “I am for Peace” campaign sa Rizal Hall sa Malacañang Palace ning Biyernes.

Sa iyang keynote speech, si Presidente Aquino miila sa mga mga babag sa malahutayon nga solusyon sa 42 anyos nga panagbangi sa Mindanao.

"Imbis nga kita ang magtimbayayong  , gipili sa uban ang panagbangi . Nakabaton kita sa nagbangi nga mga panghunahuna ug armado nga panagbingkil. Ang nakaguol tungod kay daghan nga mga panagsultihanay ang nalangan nga mao usab ang kadaghanon sa mga inosente nga mga  Pilipino ang nadamay sa mga panagbangi," matud pa niya.

"Atong nasabtan ang ugat niini. Adunay uban nga ilang gipili nga magpakabuhi ilawom sa anino sa kahadlok ug kabangis. Adunay uban nga gikapoy na sa daut nga sistema, samtang ang uban nakamata sa kultura ug  ideolohiya sa armadong pakigbisog," matud pa sa Presidente.

Hinoon ang Presidente mihatag gibug-aton nga iyang nakita ang postibo nga mga timaan nga ang kagamhanan ug  MILF, uban ang suporta sa katawhan ang makatangtang sa babag uban pagmugna sa mga pamaagi aron paghatag solusyon sa mga hinungdan sa panagbangi nga naka-apketar sa proseso sa kalinaw.

"Ang resulta: gikan sa 2010 hangtud sa 2012, padayon nga mikunhod ang mga panghitabo sa engkwentro tali sa atong mga sundalo ug  MILF. Sa pagkatinuod gikan sa Enero hangtud sa Agosto sa kasamtangan nga tuig, aduna kita’y zero nga enkwentro, ug hinaut nga magpadayon kini. Gawas sa dul-an sa 600 nga mga rebelde nga mitugyan sa ilang kaugallingon ug nakabalik sa ilang mga dapit dihang atong giusunod ang tul-id nga dalan, dul-an sa 355 ka mga rebelde nga atong nahatagan ug dinalian nga livelihood assistance," matud pa niya.

Nakaangkla sa National Security Policy sa administrasyon nga nakapunting sa governance, delivery of basic services, economic reconstruction and sustainable development, ug security sector reform,  ang hepe ehekutibo mihatag kasegurahan sa mga sumusnod nga henerasyon sa malahutayon nga kalinaw.

"Isip puhununan sa kaugmaon sa ilang mga anak, adunay usa ka gatos nga scholarship grants kita nga ihatag sa kasamatangan nga tuig. Padayon nga ang mga panalangin nga gihatag ilawom sa Payapa at Masaganang 
Pamayanan, o PAMANA Program nga nakabukas sa dul-an sa 1,400 nga bag-o nga balay sa North Cotabato ug Maguindanao, ingon man sa dul-an sa 55,700 na benepisyaryo sa atong Community-driven Development projects," matud pa niya. (GCC/PCOO/PIA9-Zambosur)