Pilipinas mitanyag ug strategic partnership sa Australia, matod pa ni Aquino

Ni Alfonso T. Ruda

DIPOLOG CITY, OCT. 18(PIA)---Mitanyag ang Pilipinas sa Australia  ug strategic partnsership nga susama sa partnership sa nasod ug sa Estados Unidos sa Amerika ug Japan, matod pa ni Presidente Benigno Aquino III.

Aduna lang kitay duha ka strategic partnership, usa uban sa Estados Unidos ug usa usab uban sa Japan. Atong karong gitanyag ang ikatulo sa Australia ang susamang partnership ug kasamtangan nila kining gitun-an, matod pa ni Presidente Aquino sa tinuig nga forum sa Foreign Correspondents of the Philippines (FOCAP) nga gipahigayon didto sa Manila.

Apan bisan ug wala ang strategic partnership padayon na ang Australia sa PIlipinas uban sa Coast Watch System paghatag ug pagbansay-bansay sa mga Filipinong sundalo nga gipatuman sa Australian military security forces.

Ang sistema naghatag usab ug scholarship sa mga personahe sa military sa nasod. Nakigtagbo usab ang mga eksperto sa Australia sa nagkalain-laings institusyon sa nasod, matod pa ni Presidente Aquino.

Sumala pa sa Presidente, mahinungdanon ang partnership sa Pilipinas ug Australia tungod ang duha ka nasod  nag-ambitay sa susamang values, dunay parehong matang sa pangagamhanan, ingon man rehiyonal ug kalibutanong hagit.

“Normally, pareho kaming naa sa susamang bahin sa usa ka isyo nga giatubang sa among tagsa-tagsa ka katawhan sukad pa niadtong ikaduhang gubat sa Kalibutan; gubat sa Korea ug gubat sa Vietnam. Nag-atubang kami ug susamang hagit, kalibutanong kausaban sa klima; ug relasyon uban sa mga gamhanang nasod sa kalibutan.” Matod pa niya.

“Kining tanan nagdala kanato padulong sa pag-inambitay sa values; ug gumikan niini, nagresulta kini sa hugtanong pagtinabangay tali sa katwhan sa duha ka nasod.”

Giratipikahan sa senado sa Pilipinas niadtong Hulyo ang Status of Visiting Forces Agreement tali sa PIlipinas ug Australia.

Sumala pa sa mga magbabalaod sa Pilipimas, makabenpisyo ang nasod gikan sa SVFA pinaagi sa edukasyon sa military; pagbansay-bansay ug ehersisyo  ; Kalihokang tawhanon ug uban pang susamang kalihokan uban sa Australia.(ATR/PCOO/PIA9-Zambo Norte)

Pres. Aquino mo-isyo ug EO nga magpabarog sa Transition Commission pagkahuman sa Comprehensive Framework Agreement

Ni Alfonso T. Ruda

DIPOLOG CITY, OCT. 17(PIA)---Nakatakdang sunod nang i-isyo ni Presidente Benigno Aquino III ang Orden Ehikutibo nga magpabarog sa Transition Commission kon mahuman na sa mga negosyador sa gobyerno ug Moro Islamic Liberation Front (MILF) ang mga annexes sa bag-ohay pa lamang nga gipirmahang Framework Agreement.

Ang gobyerno ug MILF mipirma niadtong Lunes sa Framework Agreement nga nagtumong nga hatagan ug kinutuban ang kapin sa 40 ka tuig nga rebelyon sa mga Muslim dinhi sa habagatang bahin sa nasod. Ang pagpirma gisaksihan nila ni Presidente Aquino, Malaysian Prime Minister Dato Sri Mohd Najib Bin Tun Abdul Razak, MILF chairman Al Haj Murad Ibrahim ug uban pang partners.

Sa regular press briefing sa Malakanyang, si Presidential spokesperson Edwin Lacierda nagkanayon nga sa pagkakaron, wala pa mag-isyo si Presidente Aquino ug nagpaabot pa kini nga mahuman sa mga negosyador ang mga annexes

Sa gipahigayong press briefing sa Malakanyang human nga napirmahan ang Framework Agreement, ang Hepe sa mga negosyador sa gobyerno nga si Marvic Leonen nagkanayon nga target nilang human ang mga annexes sa di pa matapos kining tuiga o kaha mas sayo pa niini.

Kasunod niini, miapela sa Lacierda sa mga nagduda nga suportahan ang Framework Agreement human nga nakita ang hugtanong suporta sa Katilingbang Muslim sa nasod sa napalig-ong kasabutan.

Samtang inyong nakita ang halapad nga suporta gikan sa Bangsamoro community ug samtang nagsaulog kita dinhi sa Manila sa pagpirma sa Framework Agreement, duna usay nagsaulog sa Camp Darapanan ug sa uban pang bahin sa Mindanao,” matod pa ni Lacierda.

Gipatin-aw usab ni Lacierda ang suportang pinansyal nga gihatag sa Administrasyong Aquino sa Mindanao, partikularmente sa bag-ong Bangsamoro entity.  

Ang gobyerno naggahin ug 21 bilyones ka pesos sa Autonomous Region in Muslim Mindanao (ARMM) para sa 2012, matod pa ni Lacierda. Gihisgutan usab sa Presidente ang 8.5 bilyones ka pesos nga ponding gitawag ug Transition Investment Support Plan sa pagpirma sa kasabutan niadtong Lunes.

Matod pa ni Lacierda, ang kwarta gamiton sa pagpondo sa mga broad-based nga mga proyekto sama sa elektripikasyon, pagtukod ug mga seaports ug fishing ports, day-care centers ug uban pang programa.(ATR/PCOO/PIA9-Zambo Norte)